चिंचवडगावातील जलतरण तलाव अखेर खुला

चिंचवड, ता. १४ ः गेल्या दोन महिन्यांपासून नादुरुस्त आणि बंद अवस्थेतील स्व. बाळासाहेब विठोबा गावडे जलतरण तलाव अखेर खुला झाला. त्यामुळे नागरिकांनी एकमेकांना पेढे वाटून आनंद साजरा केला.
जलतरण तलाव लवकर सुरू न केल्यास उपोषण करण्याचा इशारा काही संस्था-संघटनांनी दिला होता. त्यावर महापालिका प्रशासनाने अडचणी स्पष्ट करत वेळ मागितला होता. अखेर सकाळी ६ वाजता जलपूजन करून नारळ वाढविण्यात आला आणि पहिली बॅच जलतरणासाठी उतरली. उन्हाळ्याचा हंगाम पूर्ण वाया केला. मात्र, पावसाळ्यात का होईना तलाव सुरू झाल्याने जलतरणप्रेमींमध्ये आनंदाचे वातावरण आहे.
यावेळी लायन्स क्लब अध्यक्ष रवींद्र काळे, वुई टुगेदर फाउंडेशनचे मधुकर बच्चे,सलीम सय्यद,जयंत कुलकर्णी, दिलीप चक्रे, अनिल गावडे, दिनेश राजपूत यांच्यासह अनेक पदाधिकारी आणि नागरिक उपस्थित होते.

‘‘बाळासाहेब गावडे जलतरण तलावमधील पाणी खराब झाले होते. तसेच अंतर्गत कामे करायची असल्यामुळे तलाव कित्येक दिवस बंद होता. प्रायोगिक तत्वावर सध्या पासधारकांसाठी जलतरण तलाव चालू केला आहे. आठवड्याभरात सर्वांसाठी सुरू केला जाईल.’’
- पंकज पाटील, उपायुक्त, क्रीडा विभाग