चिंचवडच्या चापेकर चौकात पीएमपीचे प्रवासी थेट पदपथावर

चिंचवड, ता.१९ ः चिंचवडगावातील चापेकर चौकामध्ये महत्त्वाच्या ठिकाणी पुण्याहून येणाऱ्या सर्व पीएमपी बससाठी थांब्याची बसमधून उतरताना नागरिकांना थेट पदपथावर उभे राहावे लागत आहे. बसमधील प्रवासी हे पदपथावर उतरत असल्यामुळे गर्दी होत आहे. त्यामुळे पादचाऱ्यांनाही चालताना अडथळा होतो आहे. त्याने अपघाताचा धोका वाढला आहे.
गेल्या कित्येक वर्षांपासून चापेकर चौकातील बसथांब्याची हीच परिस्थिती आहे. कोणतेही निवारा शेड नसल्यामुळे प्रवाशांना दररोज त्रासाला सामोरे जावे लागत आहे. महिला, विद्यार्थी, ज्येष्ठ नागरिक, दिव्यांग प्रवाशांना निवाऱ्यासाठी तसेच बसण्यासाठी कोणतेही शेड नाही. त्यामुळे उन्हाळा आणि पावसाळ्यामध्ये सर्वांना विशेष त्रास होत आहे. प्रवाशांना झाडाखाली उभे राहावे लागत आहे.

दररोज महाविद्यालयावरून येताना व जाताना झाडाखाली उभे राहून बसची वाट पहावी लागते. पावसात आणि उन्हात खूप त्रास होतो. शेड आणि योग्य बस थांबा असावा हीच अपेक्षा.
- साईराज भोईर, विद्यार्थी

जवळपास कुठे बस थांबा नसेल; तर त्याची पाहणी केली जाईल. परिसरातील नागरिकांनी निवारा शेडच्या मागणीसाठी लेखी पत्र दिल्यास हे प्रकरण पुढे मांडता येईल. लोकांची मागणी अधिकृतपणे आल्यास नक्कीच बस थांबा व निवारा शेड उभारता येईल.
- किशोर चौहान, जनसंपर्क अधिकारी, पीएमपीएमएल