गझलकार रघुनाथ पाटील यांना चिंचवडमध्ये काव्यात्मक आदरांजली

चिंचवड, ता.१० ः महाराष्ट्र साहित्य परिषद शाखा पिंपरी चिंचवड, समिधा गझल मंच पुणे आणि साहित्य प्रकाश पुणे यांच्या संयुक्त विद्यमाने दिवंगत गझलकार रघुनाथ पाटील यांच्या पहिल्या स्मृतिदिनानिमित्त गझल अभिवाचन कार्यक्रमामध्ये त्यांच्या गझलांचे सादरीकरण करून काव्यात्मक आदरांजली वाहण्यात आली.
चिंचवडगावातील पुनरुत्थान समरसता गुरुकुलम येथे वरील कार्यक्रम झाला. कार्यक्रमाच्या अध्यक्षस्थानी राजन लाखे होते. डॉ. अविनाश सांगोलेकर यांच्या हस्ते कार्यक्रमाचे उद्‍घाटन झाले; तर प्रमुख पाहुणे म्हणून ज्येष्ठ सामाजिक कार्यकर्ते गिरीश प्रभुणे हे उपस्थित होते.
पाटील यांनी सर्वसामान्य माणसाचे सुख-दुःख, वेदना आपल्या गझलेतून प्रभावीपणे मांडल्या. कविता लेखनातही त्यांची समृद्ध परंपरा असून अनेक गझल स्पर्धांमध्ये परीक्षक म्हणून त्यांनी काम पाहिले. गझलेतील बारकावे तरुण पिढीला समजावून देण्यात त्यांचा हातखंडा होता, अशा भावना मान्यवरांनी व्यक्त केल्या.
या कार्यक्रमात आत्माराम हारे,अनिल नाटेकर, प्रतिमा काळे, कविता काळे, नीलेश शेंबेकर, सुहास घुमरे, प्रदीप गांधलीकर, जयश्री श्रीखंडे यांच्यासह जवळपास २० गझलकारांनी पाटील यांच्या गझलांचे अभिवाचन केले. काव्य रसिकांसाठी हा कार्यक्रम स्मरणीय ठरला.
प्रशांत पाटोळे यांनी प्रास्ताविक केले. रेखा कुलकर्णी यांनी सूत्रसंचालन केले; तर किरण वेताळ यांनी आभार मानले. केले.
CWD25A01763