चिंचवडमध्ये संत गजानन महाराज पुण्यतिथी महोत्सव उत्साहात

चिंचवड, ता. २९ : श्री गजानन महाराजांचा पुण्यतिथी उत्सव तानाजीनगर येथील गजानन महाराज मंदिरात मोठ्या भक्तिभावात उत्साहात साजरा करण्यात आला. २७ ते २९ ऑगस्ट या तीन दिवसांत विविध धार्मिक कार्यक्रमांचे आयोजन करण्यात आले होते.
उत्सवाची सुरुवात बुधवारी (ता. २७) गणेश चतुर्थीच्या मुहूर्तावर पहाटे ५.३० वाजता श्रींना गुलाबजल अभिषेकाने झाली. गुरुवारी (ता. २८) ऋषीपंचमीनिमित्त महाराजांचा महासमाधी दिन भावपूर्ण वातावरणात साजरा झाला. पहाटे ५:३० वा. श्रींना केशर-दूध अभिषेक, सकाळी ७.५५ वा. समाधिस्थळी नामजप, सकाळी १०.३० वा. श्री गजानन विजय ग्रंथातील १९६वा अध्याय वाचन आणि डॉ. गजानन खासनिस यांचे मनमोहक निरूपण झाले. दुपारी ११.४५ वा. नामजपाचा गजर, पुष्पवृष्टी, नैवेद्य व आरती पार पडली. सायंकाळी ५.३० वा. आनंद जोशी यांचे भागवत कथा प्रवचन झाले. रात्री ७.०० वा. महाआरती आणि हरिपाठाने दिवसाची सांगता झाली. शुक्रवारी (ता. २९) पहाटे ५.३० वा. उष्णोदक अभिषेकाने कार्यक्रमाची सुरुवात झाली. सकाळी साडेदहा ते बारापर्यंत श्री गजानन महाराज हरिपाठ मंडळाने भजन सादर केले. दुपारी १२ वा. आरती होऊन महाप्रसादाचा महोत्सव भाविकांसाठी आयोजित करण्यात आला होता.
पुण्यतिथीनिमित्त मंदिर परिसर आकर्षक रोषणाई, केळीचे खांब व आंब्याच्या पानांच्या तोरणांनी सजविण्यात आला होता. संत श्री गजानन महाराजांचा समाधी सोहळा भाविकांच्या सहभागाने, भक्तिभाव व आनंदाच्या वातावरणात पार पडला, अशी माहिती श्री गजानन सत्संग मंडळाच्या विश्वस्त मंडळाने दिली.