‘अतिटोकाच्या अहिंसेमुळे सनातन धर्माचे नुकसान’

चिंचवड, ता.१२ ः ‘‘धर्म आणि राजकारण हे एकमेकांपासून वेगळे नाहीत. राजकीय व्यवस्थेने नेहमीच धर्मांमध्ये दुही निर्माण केली आहे. भारतीय सनातन तत्वज्ञान हे सहिष्णू असले तरी अतिटोकाच्या अहिंसेच्या भूमिकेमुळे सनातन धर्माचे नुकसान झाले आहे.’’, असे मत विचारवंत डॉ. संजय उपाध्ये यांनी व्यक्त केले.
गांधी पेठ तालीम मित्र मंडळाच्यावतीने, चिंचवडगावात आयोजित ७१ व्या मासिक व्याख्यानमालेत ‘धर्म, राजकारण आणि वैयक्तिक आयुष्य’ या विषयावर ते बोलत होते. या कार्यक्रमास किसन महाराज चौधरी, नाट्य परिषदेचे किरण येवलेकर, ज्येष्ठ साहित्यिक तानाजी एकोंडे, हिंदू स्वाभिमान प्रतिष्ठानचे उत्तम दंडिमे, दत्ता सूर्यवंशी, क्रांतिवीर चापेकर स्मारक समितीचे माजी सदस्य गतिराम भोईर, व्याख्यानमाला समन्वय समितीचे राजेंद्र घावटे, रंगनाथ कुदळे आदी उपस्थित होते.
वैयक्तिक आयुष्यात धर्माचरण म्हणजे सुचिता पाळणे होय. जोपर्यंत योग्य धर्माचे पालन होत नाही; तोपर्यंत राजकारण सुधारत नाही आणि राजकारणी सुधारणार नाहीत. लोकशाहीत बहुसंख्येला महत्व असल्यामुळे धर्मवाढीसाठी प्रत्येकाने वैयक्तिक पातळीवर प्रयत्न करणे आवश्यक असल्याचेही डॉ. उपाध्ये यांनी नमूद केले.