महिला दिनी स्त्री शक्तीचा गौरव

चिंचवड, ता. ८ ः जागतिक महिला दिनानिमित्त जीवन विद्या मिशन आणि उत्कर्ष फाउंडेशन यांच्या संयुक्त विद्यमाने ‘स्त्री मुक्ती नव्हे, स्त्री सन्मान’ या विषयावर रामकृष्ण मोरे सभागृह येथे (ता. ८) सकाळी १०:३० वाजता विशेष कार्यक्रम पार पडले. कार्यक्रमात अभिनेत्री ऊर्मिला निंबाळकर यांची संवादात्मक मुलाखत उद्योजिका सुकीर्ते गुमस्ते यांनी घेतली. संवादा दरम्यान निंबाळकर म्हणाल्या, स्त्री ही केवळ कुटुंबाची नव्हे तर संपूर्ण समाजाची शक्ती आहे. महिलांच्या अनेक समस्यांची उत्तरे त्यांच्या सकारात्मक विचारांत दडलेली असतात. कार्यक्रमास पिंपरी-चिंचवड शहराचे विरोधी पक्षनेते भाऊसाहेब भोईर, नगरसेवक अनंत कोऱ्हाळे, सुरेश भोईर, जीवन विद्या मिशनचे व्याख्याते चंद्रकांत निंबाळकर तसेच ‘आपला परिवार सोशल फाउंडेशन’चे संस्थापक अध्यक्ष एस.आर.शिंदे उपस्थित होते. या प्रसंगी सहभागी महिलांचा गुलाबपुष्प देऊन सन्मान करण्यात आला.