देहू पालखी मार्गावर रस्त्याची दुरवस्था; दुरुस्तीची मागणी

देहू, ता. २५ : देहू ते देहूरोड पालखी मार्गावरील परंडवाल चौक येथे रस्त्याची दुरवस्था झाल्याने नागरिकांना मोठ्या अडचणींना सामोरे जावे लागत आहे. पावसाचे पाणी साचल्यामुळे रस्त्यात मोठा खड्डा पडला असून, त्यामुळे वाहनचालक आणि पादचाऱ्यांना जीव मुठीत धरून प्रवास करावा लागत आहे.
या ठिकाणी अरुंद पूल असून, देहू नगरपंचायत व पिंपरी-चिंचवड महानगरपालिकेच्या वतीने पाइपलाइनसाठी रस्त्याच्या कडेला खोदकाम करण्यात आले आहे. तात्पुरती दुरुस्ती करण्यात आली असली तरी रस्ता व्यवस्थित सपाट न केल्याने दोन्ही बाजूंना खड्डे पडले आहेत. पावसाचे पाणी साचल्यामुळे हे खड्डे अधिक धोकादायक बनले असून, त्वरित दुरुस्ती करण्याची मागणी ग्रामस्थांनी नगरपंचायत प्रशासन व सार्वजनिक बांधकाम खात्याकडे केली आहे.