भोसरी, मोशी, चिखलीकरांना दर्शनाची संधी

देहू, ता. १६ : संत ज्ञानेश्वर महाराज यांचा ७५० वा जन्मोत्सव आणि संत तुकाराम महाराज यांच्या ३७५ वा वैकुंठगमन सोहळे सर्वत्र सुरू आहेत. या पार्श्वभूमी आळंदी आणि देहू संस्थानच्या वतीने परतीच्या प्रवासात संत तुकाराम महाराज यांचा पालखी सोहळा आळंदीहून देहूत जाणार आहे. या पार्श्वभूमीवर भोसरी, मोशी, चिखलीकरांना तुकोबारायांच्या पादुका दर्शनाचा लाभ मिळणार असून, या मार्गावरील भाविक दर्शनासाठी उत्सुक असून, ते स्वागताच्या तयारीला लागले आहेत.
संत तुकाराम महाराज पालखी सोहळा रविवारी (ता. २०) सकाळी सहा वाजता पिंपरीतून शगुन चौक मार्गे चिंचवड गावाकडे मार्गस्थ होईल. चापेकर चौकातून पालखी सोहळा चिंचवड स्टेशनकडे येईल. चिंचवड स्टेशनमार्गे सोहळा संघवी महाविद्यालय मार्गे भोसरीकडे मार्गस्थ होईल. दुपारी दीड वाजता भोसरी येथे पालखी सोहळ्याचा विसावा असेल. त्यानंतर पालखी सोहळा भोसरीतून मॅक्झिन चौक मार्गे थोरल्या पादुका, धाकट्या पादुका मंदिराहून सायंकाळी साडेपाच वाजता आळंदीमध्ये मुक्कामी पोहोचेल, अशी माहिती संत तुकाराम महाराज संस्थानचे अध्यक्ष जालिंदर महाराज मोरे यांनी दिली.

‘‘पालखी सोहळा या मार्गावर जात असताना भाविकांच्या वतीने स्वागत करण्यात येणार आहे. हा मार्ग नवीन असल्याने निश्चित वेळ सांगता येत नाही. सोमवारी (ता.२१) पालखी सोहळा आळंदीहून देहूकडे मार्गस्थ होईल. डुडुळगाव, मोशी या ठिकाणी ग्रामस्थांच्या वतीने सोहळ्याचे स्वागत करण्यात येईल. त्यानंतर पालखी सोहळा टाळगाव चिखली येथे आगमन होईल. चिखली येथे पालखी सोहळ्याचा विसावा असेल. विसाव्यानंतर पालखी सोहळा दुपारी एकच्या सुमारास देहू येथे पोहोचेल.
- जालिंदर मोरे, अध्यक्ष, संत तुकाराम महाराज देवस्थान, देहू

असा असेल प्रवास
पिंपरी ते आळंदी
भैरवनाथ मंदिर, पिंपरी - शगुन चौक - चापेकर चौक - चिंचवड स्टेशन - संघवी महाविद्यालय - भोसरी - मॅक्झिन चौक - धाकट्या पादुका मंदिर - आळंदी.

आळंदी ते देहू
आळंदी - डुडुळगाव - मोशी - चिखली - देहू