देहू आर्मी पब्लिक स्कूलमध्ये विविध उपक्रम

देहू, ता. ७ : अशोकनगर येथील आर्मी पब्लिक स्कूलमध्ये विद्यार्थ्यांकडून ‘अन्ताया-स्वरभारती : सेलिब्रेटिंग द साऊंड ऑफ इंडिया’ प्रदर्शनाचे आयोजन करण्यात आले. यावेळी ‘स्व’- उद्योजकता शिखर संमेलन असा हा उपक्रम राबविण्यात आला.
कार्यक्रमाचे उद्घाटन ब्रिगेडियर आशिष कटोच आणि आंतरराष्ट्रीय ख्यातीचे नृत्यांगन व संस्कार भारती पिंपरी चिंचवडचे अध्यक्ष डॉ. नंदकिशोर कापोते यांच्या हस्ते झाले. अन्ताया प्रदर्शनाचा मुख्य विषय स्वरभारती होता. ज्यामधून भारताच्या समृद्ध स्थानिक वाद्य परंपरेचा उत्सवी भावाने गौरव करण्यात आला. बालवाटिका पहिली ते इयत्ता बारावी पर्यंतच्या विद्यार्थ्यांनी ५ फूट ते १२० फूट उंचीच्या भव्य, आकर्षक आणि अचूक प्रतिकृती स्क्रॅप व पर्यावरणपूरक साहित्य वापरून साकारल्या. प्रत्येक प्रतिकृतीत विद्यार्थ्यांच्या अभ्यासातील सखोलता, सर्जनशीलता आणि कौशल्याचे दर्शन घडले.
यासोबतच आयोजित करण्यात आलेले ‘स्व’- उद्योजकता शिखर संमेलनात विद्यार्थ्यांमध्ये स्वावलंबन, नवोपक्रम आणि व्यवसायिक दृष्टीकोन विकसित करणारे ठरले. शाळेकडून पुरविण्यात आलेल्या बीज-भांडवलाच्या सहाय्याने विद्यार्थ्यांनी स्वतःची उत्पादने संकल्पित करणे, डिझाइन करणे, निर्मिती, पॅकेजिंग, ब्रँडिंग, विपणन आणि विक्री या संपूर्ण प्रक्रियेचा अनुभव घेतला. कर्मचारी वृत्तीपासून उद्योजक वृत्तीपर्यंतचा हा परिवर्तनशील प्रवास विद्यार्थ्यांसाठी अत्यंत शिक्षणप्रद आणि प्रेरणादायी ठरला, असे प्रतिपादन ब्रिगेडियर कठोच यांनी सांगितले.