जलवाहिनीच्या कामामुळे वाहतुकीला अडथळे

इंदोरी, ता. १९ : मावळातील आंद्रा व जाधववाडी, तर खेड तालुक्यातील भामा-आसखेड धरणातील पाणी पिंपरी-चिंचवड महापालिका नेत आहे. त्यासाठी जलवाहिनीचे काम सुरू आहे. इंदोरी हद्दीतील चाकण-तळेगाव रस्त्यावर जांबवडे फाटा ते बाह्यवळण रस्ता या दरम्यान सुमारे १०० फूट रस्त्याची केवळ खोदाई करुन ठेवली आहे. तेथे पाइप रस्त्यावरच टाकले आहेत. त्यामुळे दीड महिन्यांपासून वाहतुकीस अडथळा निर्माण होत आहे.
तरी ठेकेदार ऑफशोअर कंपनीने त्वरीत काम पूर्ण करावे व पाइपचा अडथळा दूर करावा. अन्यथा ग्रामस्थांचे वतीने रास्ता रोको आंदोलन करण्यात येईल, असा इशारा मावळचे माजी सभापती विठ्ठल शिंदे, मावळ कृषी बाजार समितीचे संचालक दिलीप ढोरे, उद्योजक राजेंद्र काशिद व माजी उपसरपंच रवींद्र राऊत यांनी दिला आहे. तसे निवेदन संबंधित ठेकेदार कंपनी, पिंपरी-चिंचवड मनपा व तळेगाव एमआयडीसी पोलिसांना देण्यात आला आहे.
या आधीही सदर ठेकेदार ऑफशोअर कंपनीच्या कामाबद्दल नाराजी व्यक्त करुन माजी जिल्हा परिषद सदस्य प्रशांत ढोरे यांच्या
पुढाकाराने दोनदा काम रोखले होते. कंपनीचे प्रतिनिधी, मनपाचे कनिष्ठ अभियंता विवेक गजपुरे व मावळ
सार्वजनिक बांधकाम विभागाचे कनिष्ठ अभियंता आकाश पोळ यांनी ग्रामस्थांशी चर्चा करुन आश्वासन दिले होते, की खोदाई रस्त्यामधून न करता कडेने करू. तसेच सार्वजनिक बांधकाम विभाग व इंदोरी ग्रामपंचायतीची परवानगी घेऊनच काम पुढे करू. परंतू यापैकी कोणतेही आश्वासन न पाळता फसवणूक सुरू असल्याचे दिलीप ढोरे यांनी म्हटले आहे.

PNE25V24092