राजा शिवछत्रपती परिवाराकडून इंदोरी किल्ल्याची स्वच्छता

इंदोरी, ता. १८ ः गोकुळाष्टमी व दहीहंडी सणानिमित्त राजा शिवछत्रपती परिवार पुणे विभाग व नाशिक विभाग यांच्या वतीने इंदोरी भुईकोट किल्ला व परिसर स्वच्छता मोहीम राबविण्यात आली. या साफसफाई व स्वच्छता मोहिमेत सुमारे १५० मावळे व रणरागिणी सहभागी झाल्या होत्या. ही स्वच्छता मोहीम सकाळी ७ ते सायंकाळी ४ पर्यंत राबविण्यात आली.
इंदोरी गावातील राजा शिवछत्रपती परिवारातील सदस्यांनीही मोहिमेत सहभाग घेतला. मोहीम सुरू करण्यापूर्वी हनुमान मंदिराच्या प्रांगणातील भगव्या ध्वजास शिववंदन करण्यात आले. त्यानंतर स्वच्छता, पर्यावरण व गडकिल्ल्यांचे संवर्धनाचा संदेश देत गावातून प्रभातफेरी काढून किल्ल्यातील साफसफाई व स्वच्छता मोहिमेस सुरुवात करण्यात आली. तटबंदीवर वाढलेल्या झाडे-झुडुपांमुळे तटबंदीस अनेक ठिकाणी तडे गेले असून, काही ठिकाणी पडझड झाली आहे. त्यामुळे तटबंदीवरील झाडेझुडूपे काढण्यास प्राधान्य दिले. किल्ल्यातील मैदानातील व ग्रामदैवत कडजाई माता मंदिर परिसरातील गवत, झाडेझुडूपे काढून स्वच्छता केली. प्रवेशद्वाराच्या दोन्ही बाजूंच्या ओवऱ्यांचीही स्वच्छता करण्यात आली. या सत्कार्याबद्दल ग्रामस्थ व ग्रामपंचायत प्रशासनाने राजा शिवछत्रपती परिवार सदस्यांचे आभार मानले.

फोटो ः ४०७५८