इंदोरीत महिला सक्षमीकरण आरोग्य शिबिराला प्रतिसाद

इंदोरी, ता. १४ : मुख्यमंत्री समृद्ध पंचायत राज अभियानांतर्गत इंदोरी ग्रामपंचायतीत आयोजित एकल महिला सक्षमीकरण आरोग्य शिबिरात २४२ महिलांची आरोग्य तपासणी करून औषधोपचार करण्यात आले. शिबिरात इंदोरी, सुदुंबरे, सुदवडी आणि जांबवडे येथील महिला सहभागी झाल्या.
शिबिराचे उद्‍घाटन सरपंच शशिकांत शिंदे यांच्या हस्ते झाले. शिबिरात एच. बी., रक्तशर्करा, कॅन्सर तपासणी तसेच महिलांचे सर्वसाधारण आजार यांची पाहणी करून आवश्यक औषधे देण्यात आली. महिला संरक्षण अधिकारी प्रकाश बाविस्कर यांनी महिलांसाठी असलेल्या कायदे व विविध योजनांची माहिती दिली. डॉ. वामन गेंगजे यांनी आयुष्यमान भारत कार्ड आणि आरोग्य संरक्षणाबाबत मार्गदर्शन केले. सहाय्यक गट विकास अधिकारी सेवक थोरात यांनी एकल महिलांनी घरगुती उद्योग सुरू करून आर्थिक व सामाजिक उन्नती साधावी, आवडीच्या व्यवसायांसाठी प्रशिक्षण घ्यावे आणि बचत गट स्थापन करावेत, असे आवाहन केले. डॉ. पूनम फल्ले, सत्यवान राजिवडे आणि अर्चना बनसोडे यांनीही मार्गदर्शन केले. प्रास्ताविक अरुण हुलगे यांनी केले. सूत्रसंचालन प्राचार्य महादेव ढाकणे यांनी केले. आभार जुलेखा शेख यांनी मानले.