इंदोरीतील मंदिरांत अभिषेक, दत्त याग

इंदोरी, ता. ५ ः येथील दत्तात्रय कानिफनाथ मंदिर तसेच श्री धर्मनाथ मंदिर व पोलिस मदत केंद्रातील दत्त मंदिरात दत्त जयंती सोहळा उत्साहात साजरा करण्यात आला.
अभिषेक, दत्त याग, भजन, प्रवचन, कीर्तन, दत्त जन्म सोहळा, महाआरती व महाप्रसाद आदी कार्यक्रम आयोजित करून दत्त जन्मोत्सव साजरा करण्यात आला. दत्त जन्मोत्सवाचे आयोजन पोलिस मदत केंद्रात पोलिस उपनिरीक्षक प्रशांत रेळेकर व सहकारी यांनी तर धर्मनाथ
मंदिरात अंकुश ढोरे व रमण पवार यांनी व कानिफनाथ मंदिरात देवस्थान अध्यक्ष पुंडलिक गरुड यांनी केले होते. धर्मनाथ मंदिरात प्रकाश महाराज घुले यांची कीर्तन सेवा झाली. तर पोलिस मदत केंद्रात दिवसभर इंदोरी व परिसरातील भजनी मंडळांची भजन सेवा पार पडली.
कानिफनाथ मंदिरात देवस्थानच्या वतीने सोमवार १ डिसेंबर ते गुरुवार ४ डिसेंबर अखेर दररोज श्रीगुरू चरित्र पारायण झाले. विकास महाराज कंद
(देहू), रवींद्र महाराज ढोरे (इंदोरी), ज्ञानेश्वर महाराज लिपणे (देहू) व संतोष महाराज काळोखे (देहू) यांची प्रवचन सेवा सादर झाली.