अभ्यास दौऱ्यानिमित्त उत्तर प्रदेश अधिकाऱ्यांची इंदोरीस भेट

इंदोरी, ता. १० ः अभ्यास दौऱ्यानिमित्त यशदा पुणे संस्थेच्या माध्यमातून उत्तर प्रदेशातील सुमारे ३० अधिकारी व तालुकास्तरीय प्रतिनिधींनी इंदोरी ग्रामपंचायत कार्यालयास भेट दिली.
यावेळी ग्रामपंचायतीच्या माध्यमातून सुरु असलेली तसेच नियोजित विकासकामे, सी. एस. आर., इतर निधीचा वापर, करवसुली, करनिधी याबाबतची माहिती ग्रामपंचायत अधिकारी अरुण हुलगे यांनी अधिकाऱ्यांना दिली. डेप्युटी डायरेक्टर अजय सरोज, डी. पी. आर. ओ. विकास पटेल व यतेंद्रसिंग यादव, रवींद्र कुमार, भूपेंद्र प्रताप, मोहित दुबे, आशिष कुमार, अंकित तिवारी सह उत्तर प्रदेशातील ३० अधिकारी अभ्यास दौऱ्यावर होते. ग्रामस्थांच्या वतीने सर्व अधिकाऱ्यांचा महाराष्ट्रीय फेटा बांधून सत्कार करण्यात आला. इंदोरीचे ग्रामदैवत कडजाईमाता, पौराणिक इंद्रेश्वर व ब्रम्हेश्वर मंदिरांत जाऊन दर्शन घेतले. सरसेनापती खंडेराव दाभाडे यांच्या भुईकोट किल्ल्याची व ग्रामपंचायत कार्यालयाच्या नवीन इमारतीची पाहणी केली. तसेच मिया वाकी प्रकल्प व जलजीवन मिशन अंतर्गत पाणी पुरवठा प्रकल्पाची ही पाहणी केली. या प्रसंगी उपसरपंच जयश्री सावंत, ग्रामपंचायत सदस्य मधुकर शिंदे, बाळकृष्ण पानसरे आदींसह ग्रामस्थ उपस्थित होते. सरपंच शशिकांत शिंदे यांनी आभार मानले.

इंदोरी ः अभ्यास दौऱ्यानिमित्त उत्तर प्रदेशातील अधिकाऱ्यांनी ग्रामपंचायत कार्यालयास भेट दिली.