कॅडबरीतील सेवानिवृत्तांचा स्नेहमेळावा उत्साहात

इंदोरी, ता. ११ ः येथील कॅडबरी इंडिया कंपनीतील सेवानिवृत्त कर्मचारी स्नेहमेळाव्याच्या निमित्ताने सुमारे २५ वर्षांनी प्रथमच एकत्र आले. त्यांनी आठवणींना उजाळा देत हा क्षण साजरा केला.
यावेळी डॉ. अहफाज मुलाणी यांनी ‘निरामय वार्धक्याचा कानमंत्र’ या विषयावर मार्गदर्शन केले. आरोग्याची काळजी घेण्याचे महत्त्व त्यांनी अधोरेखित केले. किशोर सुबकडे यांनी दैनंदिन जीवनातील योगासनांचे महत्त्व सांगितले. एस. एन. आंबेकर यांनी सेवानिवृत्तीवेतविषयी माहिती दिली. याप्रसंगी सेवानिवृत्त कर्मचारी दशरथ ढोरे लिखित व अमीन खान संपादित ‘बोल तुकोबारायांचे’ या पुस्तकाचे प्रकाशन झाले. इतिहास अभ्यासक डॉ. प्रमोद बोराडे यांनी ज्येष्ठ नागरिक व सकारात्मक दृष्टिकोन या विषयावर मार्गदर्शन केले.
सेवानिवृत्त कामगार नेते शिवाजी आगळे यांनी आयोजनात पुढाकार घेतला. सेवानिवृत्त कर्मचारी दत्तात्रय चव्हाण यांच्या स्मरणार्थ संजय चव्हाण यांच्यातर्फे उपस्थितांना भेटवस्तू देण्यात आल्या. याप्रसंगी मराठी-हिंदी गीतांचा कार्यक्रम झाला. प्रास्ताविक व स्वागत ॲड. एम. डी. शिंदे यांनी केले. भगवान चव्हाण व दिलीप चौधरी यांनी सूत्रसंचालन केले. शंकर शेवकर, विनायक भालेराव व दशरथ ढोरे यांनी नियोजन केले. शिवाजी आगळे यांनी आभार मानले.
-----------------------------------
फोटो
इंदोरी ः कॅडबरी इंडिया कंपनीच्या सेवानिवृत्त कर्मचाऱ्यांच्या स्नेहमेळाव्यात ‘बोल तुकोबारायांचे’ या पुस्तकाचे प्रकाशन करताना प्रमुख पाहुणे.
-----