रावेतच्या एस. बी. पाटील शाळेजवळ कृत्रिम कचरा डेपो; रहिवासी त्रस्त

किवळे, ता. ४ : रावेत येथील एस. बी. पाटील शाळेजवळील सर्व्हे नंबर ११०/११३ मधील एका खासगी जागेत बांधकामावरील राडारोड्याचा कृत्रिम कचरा डेपो बनविण्यात आलेला आहे. हवेने पसरणारा कचरा व संभाव्य डासांची होणारी उत्पत्ती या भीतीने रहिवासी त्रस्त झाले आहेत. याबाबत ‘ब’ क्षेत्रीय कार्यालयातील जनसंवाद सभेत तक्रार अर्ज देऊनही आरोग्य विभाग व पर्यावरण विभाग यांनी दखल घेतलेली नाही. तसेच संबंधित जागा मालकास तंबी दिलेली नाही, अशी तक्रार स्थानिक रहिवाशांनी केली आहे. पालिकेच्या आरोग्य आणि पर्यावरण खात्याने आम्हा नागरिकांच्या सहनशीलतेचा अंत होण्याची वाट न पाहता या कृत्रिम कचरा डेपोप्रकरणी उचित कारवाई करावी, अशी मागणी स्थानिक नागरिकांनी केली आहे.