किवळेतील रस्त्यावर पाणी, उड्डाणपुलावरही तळे

किवळे, ता. २७ : पावसाने किवळेतील रस्त्यांवर तुडुंब पाणी साठल्याने वाहन चालकांची मोठी गैरसोय झाली. त्यातून मार्ग काढताना वाहनचालकांची दमछाक झाली. महापालिकेच्या ‘ब’ क्षेत्रीय कार्यालयाच्या स्थापत्य विभागाने गतवर्षात मुकाई चौक ते मुकाई देवी मंदिर दरम्यान सिमेंटचे ब्लॉक बसवून रस्त्याची दुरुस्ती केली होती. आता सुरू असलेल्या पावसाने रस्त्यांवर तळे साचले आहे. सध्या महापालिकेकडून रस्ता रुंदीकरण सुरू आहे. महापालिकेने या कामाची गती वाढवावी, अशी मागणी अक्षय तरस यांनी केली आहे.
रावेत पुलावर पाणी
किवळे - निगडी मार्गावरील रावेत येथील उड्डाणपुलावर निचऱ्या अभावी मंगळवारी पाणी साचले. त्यातून वाहने भरधाव वेगात जाताना पावसाचे पाणी दुचाकी स्वारांच्या अंगावर उडत असल्याचे चित्र होते. निचऱ्याअभावी पुलाच्या बांधकामास धोका निर्माण झाल्याकडे बबन तरस यांनी लक्ष वेधले.