सीओडी थिएटर परिसरात अस्वच्छतेमुळे डासांची पैदास

देहूरोड, ता. १५ : येथील सीओडी थिएटर परिसरातील कॅन्टीनजवळ (उपहारगृह) मोठ्या प्रमाणावर साचलेल्या कचऱ्यामुळे डासांची पैदास वाढली असून, त्यामुळे जवान तसेच खरेदीसाठी येणाऱ्या नागरिकांच्या आरोग्याला धोका निर्माण झाला आहे.
कॅन्टीनमध्ये तयार होणारा कचरा प्लॅस्टिक पिशव्यांमध्ये भरून उघड्यावरच ठेवला जात आहे. गेल्या चार दिवसांपासून हा कचरा उचलण्यात आलेला नाही. या प्लॅस्टिकमधील पाणी साठून, डासांची पैदास होत असल्याने मलेरिया, डेंगी यांसारख्या आजारांचा धोका वाढला आहे. याच परिसरात सिनेमागृह असल्याने चित्रपट पाहण्यासाठी येणाऱ्या नागरिकांनाही डासांचा त्रास सहन करावा लागत आहे. आरोग्यावर गंभीर परिणाम होण्याआधीच कॅन्टोन्मेंट प्रशासनाने संबंधित परिसरातील कचरा त्वरित उचलावा, अशी मागणी स्थानिक नागरिकांनी केली आहे.
---