गहुंजेच्या उपसरपंच बोडके जिल्हाधिकाऱ्यांकडून अपात्र घोषित

किवळे, ता. २९ : जात वैधता प्रमाणपत्र सादर न केल्याने गहुंजे ग्रामपंचायतीच्या सदस्या व नवनिर्वाचित उपसरपंच मंदाकिनी ज्ञानेश्वर बोडके यांना पूर्वलक्षी प्रभावाने अपात्र ठरविण्यात आले. जिल्हाधिकारी जितेंद्र डुडी यांनी हा आदेश दिला.
अमोल गोपीनाथ बोडके यांनी १८ डिसेंबर २०२४ ला जिल्हाधिकाऱ्यांकडे विवाद अर्ज दाखल केला होता. त्या अर्जात बोडके यांनी निवडणुकीच्यावेळी जात वैधता प्रमाणपत्र सादर न करता ग्रामपंचायत सदस्य म्हणून पदभार घेतल्याचा आरोप करण्यात आला होता. त्यावर या प्रकरणी सर्व संबंधित पक्षकारांना नोटिसा बजावून सुनावणी घेण्यात आली. सुनावणीनंतर डुडी यांनी १६ जुलैला दिलेल्या निकालात बोडके यांना ११ जुलैपासून अपात्र घोषित केले. कारण, त्यांनी त्या तारखेपर्यंत जात वैधता प्रमाणपत्र सादर केलेले नव्हते. या प्रकरणात बोडके यांच्या बाजूने ॲड. अमित आव्हाड, सोपान मुंडे, योगेश गराडे यांनी काम पाहिले. दरम्यान, मंदाकिनी बोडके यांच्याशी संपर्क होऊ शकला नाही. या आदेशाची प्रत तहसीलदार मावळ, गट विकास अधिकारी मावळ, मुख्य कार्यकारी अधिकारी जिल्हा परिषद, पुणे तसेच ग्रामसेवक ग्रामपंचायत गहुंजे यांना देण्यात आली आहे.