देहूरोड येथे विद्यार्थ्यांची डोळे तपासणी

देहूरोड, ता. ७ : कॅन्टोन्मेंटच्या महात्मा गांधी शाळेच्या प्राथमिक व माध्यमिक मराठी, हिंदी, इंग्रजी माध्यम शाळा तसेच डॉ. झाकीर हुसेन उर्दू प्रायमरी स्कूल या पाच शाळांमधील विद्यार्थ्यांची मोफत डोळे तपासणी करण्यात आली. सद्‍गुरु महर्षी वाल्मीकी आरोग्य व सफाई सेवा संस्थेच्या वतीने आयोजित करण्यात आलेल्या या शिबिरात एकूण ५५० विद्यार्थ्यांची तपासणी करण्यात आली. या दरम्यान २५ विद्यार्थ्यांमध्ये दृष्टिदोष आढळून आले. याबाबत संबंधित विद्यार्थ्यांचे शिक्षक व पालक यांना त्वरित सूचित करण्यात आले. या विद्यार्थ्यांवर उपचार मोफत करण्यात येणार असल्याची माहिती अध्यक्ष के. सी. बिडलान यांनी दिली. शाळेतील व्यवस्थापन, शिक्षक आणि आरोग्य संस्थेच्या सहकार्यामुळे विद्यार्थ्यांच्या आरोग्यविषयक गरजांकडे लक्ष वेधले गेले असून, अशा उपक्रमांमुळे लवकर निदान होऊन वेळेवर उपचार शक्य होत असल्याचे पालकांनी सांगितले.
---