सेवानिवृत्त कर्मचाऱ्यांचा बेमुदत उपोषणाचा इशारा

देहूरोड, ता.१ : देहूरोड कॅन्टोन्मेंट बोर्डामधील सुमारे ६४ सेवानिवृत्त कर्मचाऱ्यांनी २०१६ पासून थकित असलेल्या
वेतनवाढीपोटी (एमएसीपी) मोबदल्यासाठी ११ नोव्हेंबरपासून बेमुदत उपोषण करण्याचा इशारा दिला आहे.
सेवानिवृत्त कर्मचारी व माजी युनियन अध्यक्ष वसंत झेंडे, चंद्रकांत गायकवाड आणि शाजी वर्गीस यांनी त्याबाबत बोर्डाच्या मुख्य कार्यकारी अधिकाऱ्यांना निवेदन दिले आहे.
या निवेदनात नमूद केले आहे की, २०१६ पासून आम्हाला वेतनवाढीचा लाभ मिळालेला नाही. अनेक वेळा पत्रव्यवहार करूनही न्याय मिळाला नाही. केंद्र सरकारच्या सी.पी.ग्रिव्हन्स पोर्टलवरही तक्रारी प्रलंबित आहेत. सध्याचे कार्यरत कर्मचारी सप्टेंबर २०२३ पासून या लाभाचा फायदा घेत आहेत. मात्र, आम्हा ज्येष्ठ सेवानिवृत्त कर्मचाऱ्यांकडे दुर्लक्ष करण्यात येत आहे. आमच्यातील ७ ते १० विधवा तुटपुंज्या सेवानिवृत्तीवेतनावर जगत आहेत. सर्वच निवृत्त कर्मचारी ६५ वर्षांवरील असून अनेक जण आजारांनी ग्रस्त आहेत.’’