महाविद्यालयीन विद्यार्थ्यांची ‘मातीच्या मूर्ती’ कार्यशाळेला भेट

देहूरोड, ता. १३ : एसएमएस व ईटी बी. एड. महाविद्यालयाच्या प्रथम वर्षाच्या विद्यार्थ्यांनी कुंभारवाड्यातील मूर्तिकार मारुती दरेकर यांच्या मातीच्या मूर्ती बनविण्याच्या कार्यशाळेला शैक्षणिक भेट दिली.
ही भेट ‘कम्युनिटी आर्ट अँड स्किल डेव्हलपमेंट’ या उपक्रमांतर्गत आयोजित करण्यात आली. यावेळी साहाय्यक प्राध्यापिका सुहासिनी सूर्यवंशी, सर्व विद्यार्थी यांचे दरेकर यांनी स्वागत केले.
दरेकर यांनी मूर्तिकार म्हणून त्यांचा प्रवास सांगत भारतीय संस्कृतीतील भगवान गणेशाचे महत्त्व स्पष्ट केले. नैसर्गिक मातीची निवड, मळणी, मूर्तीला आकार देणे, नक्षीकाम व अंतिम सजावट अशा टप्प्याटप्प्याने मूर्ती बनविण्याचे प्रात्यक्षिक दाखविले.
विद्यार्थ्यांनी उत्साहाने सहभाग घेत पर्यावरणपूरक गणेश मूर्ती साकारली. या भेटीतून विद्यार्थ्यांना अनुभवाधारित शिक्षण मिळाले असून त्यांच्या सर्जनशीलता व कौशल्य विकासाला चालना मिळाली. अशी माहिती सूर्यवंशी यांनी दिली.