महाराष्ट्र राज्य मुख्याधिकारी संघटनेचे वार्षिक अधिवेशन उत्साहात

लोणावळा, ता. ११ : महाराष्ट्रातील नागरी स्थानिक स्वराज संस्थांचे प्रशासन यशस्वीपणे हाताळणारे महाराष्ट्र शहरी प्रशासकीय सेवेतील महाराष्ट्र राज्य मुख्याधिकारी संघटनेचे वार्षिक अधिवेशन तुंगार्ली येथील पाटीदार सेवा समाज सभागृह येथे उत्साहात पार पडले. संघटनेचे अध्यक्ष व सिडकोचे सहव्यवस्थापकीय संचालक गणेश देशमुख हे अध्यक्षस्थानी होते.
अधिवेशनाला राज्यभरातून विविध महानगरपालिकांचे आयुक्त, अतिरिक्त आयुक्त, उपायुक्त, सहाय्यक आयुक्त, विविध जिल्ह्यांचे जिल्हा सहआयुक्त, विभागीय आयुक्त कार्यालय व नगरपरिषद प्रशासन संचालनालय कार्यालयातील सहआयुक्त, उपायुक्त, विविध नगरपरिषद, नगरपंचायतचे मुख्याधिकारी व नुकतेच सेवेत रुजू झालेले परिविक्षाधीन मुख्याधिकाऱ्यांनी उपस्थिती लावली होती.

अधिवेशनादरम्यान झालेल्या वार्षिक सर्वसाधारण सभेमध्ये नुकत्याच शासनाने अधिसूचित केलेल्या महाराष्ट्र शहरी प्रशासकीय सेवा अंतर्गत मुख्याधिकारी संघटनेचे ‘महाराष्ट्र शहरी प्रशासकीय सेवा अधिकारी संघटना’ असे नामकरण व आनुषंगिक नियमात सुधारणा करणे आणि संघटनेमध्ये अतिरिक्त सचिव हे पद निर्माण करणे हे ठराव सर्वमताने मंजूर करण्यात आले. संवर्गातील अधिकारी अजीज शेख यांची भारतीय प्रशासकीय (आयएएस) सेवेत निवड झाल्याबद्दल त्यांचा सन्मान झाला. संवर्गातील सेवानिवृत्त महापालिका आयुक्त सुधाकर देशमुख यांनी संघटनेच्या १९९६ पासूनच्या वाटचालीचा आढावा घेतला. नगरविकास विभागाचे प्रधान सचिव यांचे विशेष कार्य अधिकारी अनिल मुळे यांनी मार्गदर्शन केले.
शहरी व्यवस्थापनाची जबाबदारी पार पाडत असताना अधिकाऱ्यांनी संवेदनशील असावे, अधिकाऱ्यांनी पायाभूत सुविधांसोबतच शिक्षण, आरोग्य आदी सामाजिक सुविधा यावर भर देण्याचा सल्ला संघटनेचे अध्यक्ष गणेश देशमुख यांनी दिला. पनवेल महानगरपालिका अतिरिक्त आयुक्त व संघटनेचे सरचिटणीस प्रशांत रसाळ यांनी प्रास्ताविक केले. पनवेल महानगरपालिका सहायक आयुक्त स्वरूप खारगे, शिरूर नगरपरिषद मुख्याधिकारी स्मिता काळे यांनी सूत्रसंचालन केले. संघटनेचे उपाध्यक्ष सुनील बल्लाळ यांनी आभार मानले.