चिमुकलीच्या अपहरणाचा प्रयत्न, तरुणाला अटक

लोणावळा, ता. २५ : चॉकलेटचे आमिष दाखवून शाळकरी मुलीचे अपहरण करण्याचा प्रयत्न करणाऱ्या तरुणाला अटक करण्यात आली आहे. ही घटना लोणावळा शहरात घडली.
श्रीपती महादेव गायकवाड (रा. साने चौक, चिखली) असे नराधमाचे नाव आहे. या प्रकरणी लोणावळा पोलिसांनी दिलेल्या माहितीनुसार, सदर पीडित मुलगी (वय ११) सोमवारी (ता.२४) जयचंद चौकाजवळून जात असताना श्रीपती याने तिला चॉकलेट आणि शीतपेयाचे आमिष दाखवत विनयभंग केला. तसेच सोबत नेण्याचा प्रयत्न केला. यावेळी स्थानिक तरुणांनी हटकल्याने आरोपीचा प्रयत्न उधळला गेला. नागरिकांनी तातडीने पोलिसांना ही माहिती दिली. पीडितेच्या आईने याबाबत फिर्याद दिली. त्यानंतर आरोपीवर भारतीय न्याय संहिता १३७ (२), ६२, पोस्को १२ अन्वये गुन्हा दाखल करण्यात आला.
अधिक तपास लोणावळा शहर पोलीस स्टेशनचे पोलीस निरीक्षक सुहास जगताप यांच्या मार्गदर्शनाखाली फौजदार रमेश भिसे हे करीत आहेत.