गुहागरच्या पर्यटकाचा दहिवलीमध्ये खून

लोणावळा,ता.२७ : केवळ वाहन वळविण्याच्या कारणावरून झालेल्या वादातून पर्यटनासाठी आलेल्या गुहागरमधील एका तरुणाचा दहिवली येथे खून झाल्याची धक्कादायक घटना घटना घडली. तर दोन पर्यटक जखमी झाले असून त्यांच्यावर उपचार सुरू आहेत.
कमलेश तानाजी धोपावकर (वय ४५, रा. गुहागर, रत्नागिरी) असे खून झालेल्या पर्यटकाचे नावे आहे. तर मनोज मधुकर वरवटकर (वय ४२), प्रज्वल उदय मेहता (वय २६, दोघे रा.गुहागर) अशी जखमींची नावे आहेत. याबाबत मनोज वरवटकर यांनी लोणावळा ग्रामीण पोलिस ठाण्यात फिर्याद दिली आहे. पोलिसांनी निकेश कांबिरे (रा. कर्जत, रायगड), प्रतीक देशमुख, यश कैलास पडवळ (दोघे रा. वेहेरगाव, मावळ), गौरव संजय पट्टाधारी (रा. तुंगार्ली, लोणावळा) यांच्यासह अन्य चार ते पाच जणांविरुद्ध गुन्हा दाखल केला असून दोघांना ताब्यात घेतले आहे.
पोलिसांनी दिलेल्या माहितीनुसार, मृत धोपावकर हे रविवारी (ता.२५) आपल्या मित्रांसोबत वेहेरगाव, कार्ला येथे एकवीरा देवीचे दर्शनासाठी आले होते. सायंकाळी कार्ला फाटा परिसरातील दहिवली गावाजवळ वाहन वळविण्याच्या कारणावरून पर्यटक आणि स्थानिक तरुणांमध्ये वाद निर्माण झाला. वादाचे पर्यवसान हाणामारीत झाले. आरोपींनी लोखंडी गज, दांडके, वायपर घेत पर्यटकांवर हल्ला केला. या हल्ल्यात धोपावकर यांच्या डोक्यास गंभीर दुखापत झाली. त्यांना तत्काळ रुग्णालयात नेण्यात आले. उपचादरम्यान त्यांचा मृत्यू झाला.