द्रुतगती मार्गालगत तरुणाचा मृतदेह खून करून फेकल्याची शक्यता

लोणावळा, ता. १९ ः मुंबई-पुणे द्रुतगती मार्गालगत बेडसे (ता. मावळ) येथील नाल्यात एका तरुणाचा मृतदेह आढळला आहे. या तरुणाची धारदार शस्त्राने हत्या करून मृतदेह फेकून दिल्याची शक्यता व्यक्त होत आहे.
बुधवारी (ता. १८) ही घटना उघडकीस आली. पोलिसांकडून मिळालेल्या माहितीनुसार, अज्ञात आरोपीने धारदार शस्त्राने गळ्यावर आणि पोटावर वार करून एका अनोळखी तरुणाची हत्या केली. पुरावे नष्ट करण्याच्या उद्देशाने मृतदेह वाहनातून आणून, तो बेडसे गावच्या हद्दीतील द्रुतगती मार्गालगत (कि.मी. ७१/३५०) नाल्यात टाकण्यात आला. याप्रकरणी कामशेत पोलिस ठाण्यात अनोळखी व्यक्तीच्या विरोधात गुन्हा दाखल करण्यात आला आहे. मृत तरुणाची ओळख अद्याप पटलेली नसून, पोलिसांकडून मिळालेल्या वर्णनानुसार त्याचे वय अंदाजे ३० ते ३५ वर्षे, रंग काळा सावळा, उंची सुमारे ५ फूट ५ इंच, अंगाने सडपातळ, डोक्यावर कमी केस, कोरलेली दाढी व बारीक मिशी आहे. पांढऱ्या रंगाचा फुल बाह्यांचा शर्ट, राखाडी काळ्या रंगाची जीन्स पॅन्ट व केल्विन क्लेन कंपनीची अंडरविअर परिधान केली आहे.
मृताविषयी माहिती असल्यास कामशेत पोलिसांशी संपर्क साधण्याचे आवाहन करण्यात आले आहे.