टाकवे खुर्द येथील रिक्षा चालकाचा मुलगा सनदी लेखापाल

लोणावळा, ता. ८ : मावळ तालुक्यातील टाकवे खुर्द येथील पंकज पिंपरे याने वयाच्या बाविसाव्या वर्षी सनदी लेखापाल (सीए) होण्याचा मान मिळवला आहे. पंकज याचे वडील रिक्षाचालक आहेत. ग्रामीण भागातून परिस्थिती हलाखीची असतानादेखील इच्छाशक्ती व जिद्दीच्या जोरावर प्रतिकूल परिस्थितीवर मात करत त्याने हे यश मिळवल्याने त्याच्यावर कौतुकाचा वर्षाव होत आहे. नोव्हेंबर २०२४ हा त्याचा सीए फायनलचा पहिला प्रयत्न होता. त्याचे शिक्षण टाकवे जिल्हा परिषद शाळेत झाले. माध्यमिक व उच्च माध्यमिक शिक्षण लोणावळा येथे झाले. परीक्षेअगोदर आठ दिवस त्याच्या आजीचे निधन झाले. मात्र, डगमगून न जाता त्याने अवघ्या दीड-दोन महिन्यात पंधरा ते सतरा तास अभ्यास करत सीए अंतिम परीक्षा उत्तीर्ण होत यश संपादन केले. यशामध्ये त्याचे वडील बाळासाहेब पिंपरे, आई सुजाता, मार्गदर्शक सीए गुरुदेव गरुड व सीए स्नेहल गरुड यांचा मोलाचा वाटा असल्याचे त्याने सांगितले.