ट्रेलरला धडक; एसटी बस चालकाचा मृत्यू

लोणावळा, ता. १० : चालकाचे नियंत्रण सुटल्याने एसटी बस ट्रेलरला धडकली. या अपघातात बसचालकाचा मृत्यू झाला, तर वाहकासह नऊ प्रवासी जखमी झाले. ही घटना गुरुवारी (ता.१०) मध्यरात्री सव्वादोनच्या सुमारास पुणे-मुंबई द्रुतगती मार्गावर लोणावळा ते खंडाळा घाट या दरम्यान घडली. बसमध्ये एकूण तेहतीस प्रवासी होते.
याबाबत पोलिसांनी दिलेल्या माहितीनुसार, ‘‘बसचालक इर्शाद अब्दुल मजीद शेख (वय ३८, रा. आष्टी, बीड) यांचा मृत्यू झाला. तर, वाहक सागर गुंड (रा. आष्टी वाघळूज बीड), आप्पा दादाराम ओळकुंटे (वय ६७, रा. माळेगाव, बारामती), प्रियांका खरात (वय २६), मीना खरात (वय-५२, दोघेही रा. भिवंडी), ऋतुजा हुबाळे (वय १६, रा. कुर्ला), अनिल कुटे (वय ५९), अक्षय कुटे (वय ३१, दोघेही रा. कासारवाडी, पिंपरी चिंचवड), प्रणय दिनेश चव्हाण (वय-२५), महेश मनोज शिंदे (वय-२८, दोघेही रा. सांताक्रुझ, मुंबई) यांचा जखमींमध्ये समावेश आहे. सदर बस (एमएच १४ के क्यू ४९५६) बारामतीहून मुंबई सेंट्रल येथे जात होती. महामार्गावर चालकाचे नियंत्रण सुटल्याने बस ट्रेलरला (आरजे २९ जीए ९९९४) धडकली.’’
दरम्यान, अपघाताची माहिती मिळताच खंडाळा महामार्गाचे फौजदार रवींद्र मुदाळ, पोलिस कर्मचारी विजय क्षीरसागर, विक्रम जमादार, महाराष्ट्र सुरक्षा बलाचे किरण जाधव, आयआरबी, डेल्टाफोर्स, देवदूत आपत्कालीन पथकाचे कर्मचाऱ्यांनी घटनास्थळी दाखल होत मदतकार्य सुरू केले. जखमींना सोमाटणे येथील खासगी रुग्णालयात दाखल करण्यात आले.