डॉ. पुरंदरे विद्यालय छात्रसमिती अध्यक्षपदी पौर्णिमा शेलार

लोणावळा, ता. १३ : डॉ. बी. एन. पुरंदरे विद्यालय छात्रसमिती अध्यक्षपदी पौर्णिमा शेलार तर उपाध्यक्ष म्हणून इयत्ता सातवीमधून चैतन्य मोहोळ हे विद्यार्थी विजयी झाले.
विद्यार्थ्यांना भारतीय लोकशाही, निवडणूक प्रक्रियांची माहिती व्हावी, नेतृत्वगुणांना वाव मिळावा यासाठी डॉ. बी. एन. पुरंदरे विद्यालयात या उपक्रमाचे आयोजन करण्यात येते. २०२५-२६ या शैक्षणिक वर्षाकरिता छात्रसमिती अध्यक्ष व उपाध्यक्ष पदाची निवडणूक शासकीय निवडणुकांप्रमाणे पार पडली. या निवडणुकीस विद्यालयातील छात्रसमिती अध्यक्ष पदासाठी नववीमधून सहा उमेदवार तर उपाध्यक्ष पदासाठी सातवीमधून तीन उमेदवार निवडणुकीच्या रिंगणात होते. निवडणुकीमध्ये मतदार म्हणून विद्यालयातील ५०० विद्यार्थ्यांनी मतदानाचा हक्क बजावला. ही निवडणूक प्रक्रिया मुख्याध्यापक यशवंत बारवकर व पर्यवेक्षक ज्ञानेश्वर रणपिसे यांच्या मार्गदर्शनाखाली पार पडली. छात्रसमिती प्रमुख संदीप क्षीरसागर व उपप्रमुख मंजुश्री इकारी यांनी निवडणूक निर्णय अधिकारी म्हणून काम पाहिले. प्राथमिकचे मुख्याध्यापक आनंद गावडे यांनी विद्यार्थ्यांनी अनुभवलेल्या निवडणूक प्रक्रियेचे महत्त्व सांगताना भविष्यात मतदार म्हणून विद्यार्थ्यांचे महत्त्व काय असेल हे विशद केले. या निवडणूक प्रक्रियेत विद्यालयातील सर्व शिक्षक, शिक्षकेतर कर्मचारी यांचे मोलाचे सहकार्य लाभले.