लोणावळ्यात पीएमपी बसच्या धडकेत तरुणाचा मृत्यू

लोणावळा, ता. २८ : पीएमपी बसच्या धडकेत दुचाकीस्वाराचा मृत्यू झाला. हा अपघात सोमवारी (ता.२८) सकाळी सव्वासहाच्या सुमारास पुणे-मुंबई जुन्या महामार्गावर मिनू गॅरेज चौकात झाला. अविनाश दत्तात्रय काळे (वय - ३०, रा. गणेशखिंड औंध, पुणे) असे मृत्यू झालेल्याचे नाव आहे.

लोणावळा पोलिसांनी दिलेल्या माहितीनुसार, ‘‘अविनाश हा पुण्याहून त्याच्या दुचाकीवर (एमएच १२-एलएल ७५३३) मुंबईकडे निघाला होता. दरम्यान, लोणावळ्याहून निगडीकडे निघालेली पीएमपी बस (एमएच १४ एचयू ५५२५) मिनू गॅरेज येथून वळण घेत असताना तिची दुचाकीला धडक बसली. यावेळी चाकाखाली आल्याने अविनाश याचा जागीच मृत्यू झाला. या प्रकरणी अक्षय दिगंबर काळे (वय - २६, रा. वारजे, पुणे) यांनी फिर्याद दिली आहे. या प्रकरणी बसचालक प्रमोद शिवाजी पोळ (वय-३५) याच्या विरोधात लोणावळा पोलिसांत गुन्हा दाखल करण्यात आला आहे. पोलिस हवालदार देविदास चाकणे अधिक तपास करत आहेत.