विसापूर किल्ल्यापाशी एक तरुण मृत्युमुखी

लोणावळा, ता. २ : भाजे येथे पर्यटनासाठी आलेला पुण्यातील एक तरुण शनिवारी दुपारी धबधब्यापाशी पाय घसरून मृत्यूमुखी पडला. विसापूर किल्ल्याकडे जाताना आडवाटेने जाण्याचे धाडस त्याच्या जिवावर बेतले.
अब्राहम शिंसे (वय २९, बेथनी आश्रम, रामवाडी, पुणे) असे मृताचे नाव आहे. तो सुमारे वीस जणांच्या गटासह लोहगड व विसापूर किल्ला परिसरात आला होता. भाजे धबधब्यावर त्यांनी आनंद लुटला. त्यानंतर ते विसापूर किल्ल्यावर जाण्यासाठी निघाले. या किल्ल्याच्या उत्तरेला पाटण, तर दक्षिणेला लोहगड, मालेवाडीच्या बाजूने वाट आहे. नेहमीची वाट सोडून अब्राहमने भाजे गावाजवळील लेणी व धबधब्याच्या बाजूने जाण्याचा प्रयत्न केला. निसरड्या वाटेने जाताना पाय घसरून तो तीस ते चाळीस फूट खाली पडला. खडकावर डोके आपटल्याने गंभीर मार लागून त्याचा जागीच मृत्यू झाला.
लोणावळा ग्रामीण पोलिस व शिवदुर्ग संस्थेच्या बचाव पथकाच्या त्याचा मृतदेह खाली आणला. शिवदुर्गच्या सागर कुंभार, सागर दळवी, मोरेश्वर मांडेकर, यश मसने, राजेंद्र कडू, पिंटू मानकर, ओंकार पडवळ, अशोक उंबरे यांनी त्यासाठी अथक प्रयत्न केले.

सूचनांकडे दुर्लक्ष

तरुणाईची बेफिकीर वृत्ती आणि अतिउत्साहामुळे वारंवार दुर्घटना होत आहेत. लोणावळा परिसरातील पर्यटनस्थळांवर जिल्हाधिकाऱ्यांनी अनेक निर्बंध घातले आहेत. गेल्याच महिन्यात ड्युक्स नोज, विसापूर, तुंगी किल्ला अशा ठिकाणी पडून पर्यटक जखमी झाले. काही जण बुडाल्याचे प्रकारही घडले. नियमांकडे दुर्लक्ष करणारे पर्यटक आत्मघात करीत आहेत.
----