लोणावळ्यात गांजा विक्री करणाऱ्यास अटक

लोणावळा, ता. ८ : गांजा विक्री करण्याच्या प्रयत्नात असलेल्या एकास लोणावळा शहर पोलिसांनी अटक केली आहे. त्याच्याकडून २ किलो ७० ग्रॅम गांजा जप्त केला आहे. पोलिसांनी दिलेल्या माहितीनुसार आरोपी अब्दुल शेख (गुरव वस्ती, कुसगाव बु.) हा शहरातील विविध भागांत गांजाची होम डिलिव्हरी करत असल्याची माहिती डीबी पथकाला मिळाली होती. त्यानुसार पथकाने जिल्हा पोलिस अधीक्षक संदीप सिंह गिल, लोणावळा उपविभागीय पोलिस अधिकारी गजानन टोम्पे, वरिष्ठ पोलिस निरीक्षक राजेश रामाघरे यांच्या मार्गदर्शनाखाली सापळा रचला आणि गांजासह त्याला पकडले. त्याचा एक साथीदार फरार झाला. शेख याच्यावर एनडीपीएस कायद्यानुसार गुन्हा दाखल केला आहे. वडगाव मावळ न्यायालयाने त्याला दोन दिवसांची पोलिस कोठडी सुनावली असून पोलिस पुढील तपास करत आहे.