लोणावळा परिसरात दत्त जयंती उत्साहात

लोणावळा, ता. ५ : लोणावळा, कार्ला, कुसगाव बुद्रुक परिसरात दत्त जयंती उत्साहात साजरी झाली. परिसरातील मंदिरांत विविध धार्मिक कार्यक्रमांचे आयोजन केले होते. भाविकांनी ''दिगंबरा दिगंबरा श्रीपाद वल्लभ दिगंबरा'' या जयघोषात मंदिरांमध्ये दर्शन घेतले आणि अनेक ठिकाणी सुवर्ण पादुका अभिषेक, गुरुचरित्र पारायण, कीर्तन, भजन आणि महाआरती आदी कार्यक्रम झाले. कालेकर मळा, दत्तवाडी कुसगाव बुद्रुक, ग्रामीण पोलिस ठाणे, खंडाळा महामार्ग पोलिस मदत केंद्र, जयचंद चौक येथील दत्त मंदिरात दर्शनासाठी भाविकांनी गर्दी केली होती.
शहरातील सर्व रिक्षा स्टँडमध्येही पूजेचे आयोजन केले होते. पहाटेपासून मंदिरांमध्ये धार्मिक कार्यक्रमांना सुरुवात झाली. यामध्ये गुरुचरित्र पारायणाची समाप्ती, हरिपाठ, दत्त जन्माचे कीर्तन आणि अभिषेक यांचा समावेश होता. दिवसभर महिला आणि पुरुष भजनी मंडळांचे भजन झाले. दत्त जयंतीनिमित्त मंदिरांची आकर्षक फुलांनी आणि विद्युत रोषणाईने सजावट करण्यात आली होती. कालेकर मळा येथे ग्रामस्थांच्या वतीने उत्साहात पालखी सोहळ्याचे आयोजन करण्यात आले होते. दत्तजन्म सोहळ्यानंतर आतषबाजी करण्यात आली.