अश्वारोहण स्पर्धेत तन्मय वांद्रेंला ब्राँझ

लोणावळा, ता. ११ : राष्ट्रीय ज्युनिअर अश्वारोहण स्पर्धेत लोणावळा येथील युवा स्पर्धक तन्मय संजय वांद्रे याने पदार्पणातच ब्राँझ पदक पटकावले. ड्रसाज, शो जंपिंग आणि क्रॉसकंट्री या तिन्ही प्रकारांत त्याने सातत्य आणि आत्मविश्वास प्रदर्शित केला.
भारतीय अश्वारोहण महासंघातर्फे दिल्लीतील कॅन्टोन्मेंट येथील आर्मी इक्वेस्ट्रियन सेंटरमध्ये ही स्पर्धा झाली. यात विविध राज्यांतील २०० पेक्षा जास्त स्पर्धक सहभागी झाले. तन्मयने सांघिक प्रकारात सहभाग घेतला. तो तळेगाव येथील अश्वारोहण ॲकॅडमीतील रोहन मोरे, राजस्थानचे कॅप्टन भगीरथ सिंग तसेच पुण्याचे आशिष लिमये यांच्या मार्गदर्शनाखाली सराव करतो. तो काही वेळा फ्रान्समध्येही प्रशिक्षण घेतो. लिमये यांनी नुकत्याच झालेल्या आशियाई स्पर्धेत सुवर्णपदक पटकावले होते. तन्मय वयाच्या अवघ्या सातव्या वर्षापासून अश्वारोहणाचे प्रशिक्षण घेत आहे. त्याने आतापर्यंत विविध स्पर्धांमध्ये पदके मिळविली आहेत.
---