विभागीय पॉवरलिफ्टिंग स्पर्धेत ज्ञानेश्वरी साबळेला सुवर्णपदक

​लोणावळा, ता. २० : क्रीडा व युवक सेवा संचालनालय महाराष्ट्र राज्य, जिल्हा क्रीडा कार्यालय, पुणे आणि ॲमेच्युअर पॉवरलिफ्टिंग असोसिएशन, पुणे यांच्या वतीने आयोजित पुणे विभागीय शालेय पॉवरलिफ्टिंग स्पर्धेत डॉ. बी. एन. पुरंदरे बहुविध विद्यालयातील विद्यार्थिनी ज्ञानेश्वरी साबळे हिने नेत्रदीपक कामगिरी करत सुवर्णपदक पटकावले.
या यशासह तिची राज्यस्तरीय पॉवरलिफ्टिंग स्पर्धेसाठी निवड झाली आहे. वडगाव मावळ येथील रमेशकुमार सहानी इंग्लिश मीडिअम स्कूल येथे ही स्पर्धा पार पडली. आठवीमध्ये शिकणाऱ्या ज्ञानेश्वरीने ६९ किलो वजनी गटात सहभागी होऊन स्कॉट ७५ किलो, बेंच प्रेस ३० किलो, डेडलिफ्ट ७५ किलो असे एकूण १८० किलो वजन उचलून तिने सुवर्णपदक आपल्या नावे केले.
​ज्ञानेश्वरीच्या या यशामुळे डॉ. बी. एन. पुरंदरे विद्यालयाच्या शिरपेचात मानाचा तुरा रोवला गेला आहे. तिच्या या यशाबद्दल मुख्याध्यापक, शिक्षक वृंद, क्रीडा प्रशिक्षक व क्रीडाप्रेमींकडून तिचे कौतुक होत आहे.