पुण्यातून बेपत्ता तरुणाचा मृतदेह लोणावळ्यातील दरीत आढळला

लोणावळा, ता.१२ : पुण्यातून बेपत्ता असलेल्या तरुणाचा मृतदेह गुरुवारी (ता.१२) पर्यटनस्थळ लायन्स पॉइंट येथील दरीत आढळला. शिवदुर्ग रेस्क्यू टीमने सदर मृतदेह सायंकाळच्या सुमारास वर काढला.
विरेंद्र सिन्हा (वय ३२, सध्या रा. बाणेर, पुणे) असे मृत्यू झालेल्या तरुणाचे नाव आहे. त्याने आत्महत्येबाबत बुधवारी (ता.११) व्हॉट्स ॲपवर स्टेटस ठेवले होते. त्यानंतर तो बेपत्ता होता. मित्रांनी शोध घेऊनही तो सापडला नव्हता. त्यानंतर पुण्यातील चतु:शृंगी पोलिस ठाण्यात ‘मिसिंग’ तक्रार देण्यात आली होती. दरम्यान, विरेंद्रची मोटार लायन्स पॉइंट येथील वाहनतळावर आढळली होती. तर, तपासणीदरम्यान त्याचे शेवटचे मोबाइल लोकेशन याच परिसरात आढळले. त्यावर पोलिस व बचाव पथकांनी शोधमोहीम राबवली. गुरुवारी (ता.१२) शिवदुर्ग रेस्क्यू टीमने येथील ४०० फूट खोल दरीतही विरेंद्रचा शोध घेतला. कठीण आणि धोकादायक परिस्थितीत सलग पाच तास तपास करत या टीमने विरेंद्रचा मृतदेह शोधला. विरेंद्र हा बाणेर येथे एका खासगी कंपनीत नोकरीला होता. त्याच्या मृत्यूचे नेमके कारण रात्री उशिरापर्यंत समोर आले नव्हते.