मोशी, डुडूळगावातील शेतीचे नुकसान

मोशी, ता. १९ : गेल्या अनेक दिवसांपासून मावळातील संततधार पावसाने इंद्रायणी नदीच्या पाण्याच्या पातळीत मोठी वाढ झाली आहे. त्याने मोई गावचा महापालिकेशी संपर्क तुटला आहे. मोशीतील जुन्या पुलावरील वाहतूक बंद करण्यात आली आहे. मोशी, डुडुळगाव, वहिलेनगर परिसरातील शेतपिकांचे नुकसान झाले आहे. नदीपात्राजवळील मोशी स्मशानभूमीला पाणी लागले आहे.
अनेक दिवसांपासून पावसाने विश्रांती घेतल्याने नदीची पाणी पातळी कमी झाली होती. परंतु मावळात जोरदार पाऊस सुरू असल्याने इंद्रायणी नदीच्या पाण्याच्या पातळीत मोठ्या प्रमाणावर वाढ झाली आहे. चिखली - मोई पूल पाण्याखाली गेल्याने मोई गावाचा पिंपरी चिंचवड महापालिकेशी संपर्क तुटला आहे. इंद्रायणी नदीतील जलपर्णी वाहून गेली. त्यामुळे नदीचे पात्र स्वच्छ दिसत आहे. नदीकाठच्या भागांमधील शेतींमध्ये पाणी भरले आहे. मोशीतील जुन्या पुलाला हे पाणी लागायला फक्त दीड ते दोन फूट अंतर राहिले आहे. जुन्या पुलावरील वाहतूक बंद करण्यात आली असून प्रशासनाच्यावतीने प्रतिबंधात्मक कार्यवाही करण्यात आली आहे.
मोशी, डुडुळगाव परिसरातही रात्रीपासून संततधार सुरू आहे. पुणे - नाशिक महामार्गावरील बोराटे वस्ती, सस्ते वाडी आदी ठिकाणी मोठ्या प्रमाणावर पाणी साठल्याने वाहतूक कोंडी झाली. मोशी गावठाण, प्राधिकरण आदी परिसरातील रस्त्यांवरील सखल भागातही पाणी साचल्याने पादचाऱ्यांची तारांबळ उडाली. डुडुळगाव, वहिलेनगर, मोशीतील अनेक शेतकऱ्यांच्या शेतांमध्ये बांध फुटून पाणी आत शिरले असून मोठ्या प्रमाणावर पाणी साचून पिकांचे नुकसान झाले आहे.
स्थानिक शेतकरी सुनील वहिले म्हणाले,‘‘भात शेतीसाठी हा पाऊस उपयुक्त होता. मात्र, जोरदार पावसाने ही रोपेही वाहून गेली आहेत.’’
MOS25B03696