प्राधिकरणातील विहिरीवरील खराब जाळी बदलण्याची मागणी

मोशी, ता.२२ : प्राधिकरणातील पेठ क्रमांक ४ मधील महापालिकेच्या लोंढे उद्यानाशेजारील विहिरीवरील संरक्षक जाळी तुटली आहे. उद्यानामध्ये लहान मुले खेळायला येत असल्याने कधीही दुर्घटना घडण्याचा धोका निर्माण झाला आहे. त्यामुळे उद्यान विभागाने तिच्यावरील संरक्षक जाळी बदलावी, अशी मागणी स्थानिक नागरिकांनी केली आहे.
महापालिकेमार्फत प्राधिकरणातील पेठ क्रमांक ४ मध्ये ट्रॅफिक पार्कसमोर लोंढे उद्यान विकसित करण्यात आले आहे.
या उद्यानामध्ये सकाळी आणि सायंकाळी लहान मुले खेळायला; तर गप्पागोष्टी करायला नागरिकांची मोठी गर्दी होत असते. या उद्यानाशेजारीच जुन्या काळातील एक मोठ्या आकाराची बाराही महिने पाणी असलेली एक मोठी विहीर आहे. ही विहीर सध्या महापालिकेच्या ताब्यात असून त्यामधील पाणी उद्यानातील झाडांना दिले जाते. या विहिरीत पडून दुर्घटना घडू नये म्हणून एक संरक्षक जाळी बसविण्यात आलेली आहे. मात्र, गेल्या अनेक महिन्यांपासून ही संरक्षक जाळी अनेक ठिकाणी गंजली आहे. तर काही ठिकाणी ती तुटलेलीही आहे. तिचे तुटलेले झाकणही सताड उघडेच असते. उद्यानातील मुले खेळताना कधी कधी या विहिरीजवळही येतात. विहिरीतील मासे पाहताना कदाचित त्यांचा तोल जाऊन इथे अपघातही घडू शकतो.

MOS25B03777