नववर्षाच्या स्वागतासाठी मोशी प्राधिकरणात ‘भक्ती शक्ती संगम’ चे आयोजन

मोशी, ता. ४ : मोशी प्राधिकरणातील संतनगरमध्ये नववर्षाची सुरवात भक्तीमय वातावरणात करण्यासाठी ‘भक्ती शक्ती संगम’ या उपक्रमांतर्गत अखंड हरिनाम सप्ताहाचे आयोजन करण्यात आले आहे. प्रत्येक वर्षाच्या पहिल्या रविवारी हा उपक्रम राबविला जात असून यंदा तपपूर्ती सोहळ्यानिमित्त हा कार्यक्रम होत आहे. या वर्षात १८७ वे पुष्प अर्पण केले जात आहे.
या सप्ताहाचा पहिला दिवस रविवारी (ता. ४) सायंकाळी साडेचार वाजता वटेश्वर महिला भजनी मंडळ यांच्या भजनाने सुरू होणार आहे. सायंकाळी सात वाजता रंगनाथ महाराज नाईकडे (आयएफएस, निवृत्त मुख्य वनसंरक्षक) यांचे कीर्तन होणार आहे. रात्री नऊ नंतर महाप्रसादाचे आयोजन करण्यात आले आहे.
अध्यात्मासोबत विज्ञान व पर्यावरणाची सांगड घालून जनप्रबोधन, पर्यावरण जनजागृती गडकिल्ल्यांचे संवर्धन व स्वच्छतेचा संदेश देणारा हा उपक्रम आहे. कार्यक्रमाचे आयोजन श्री हनुमान मंदिर येथे करण्यात आले आहे. सर्व भाविकांनी उपस्थित राहावे, असे आवाहन आयोजकांनी केले आहे.