घरांसमोरील गतिरोधकामुळे पेठ क्र.४ मधील रहिवासी त्रस्त

मोशी, ता. १६ : मोशी प्राधिकरणातील पेठ क्रमांक ४ मधील पीसीएनडीटीए कार्यालयाशेजारी असलेल्या गतिरोधकावरील पांढरे पट्टे पूर्णपणे नष्ट झाले आहेत. हे गतिरोधक काही घरांच्या अगदी समोरच असल्याने या घरांतील अबालवृद्ध नागरिकांना मोठ्या त्रासाला सामोरे जावे लागत आहे.
घरांच्या अगदी समोरच असल्याने येथून जाणारी जड वाहने वेगाने गतिरोधकावर आदळत जातात आणि त्यामुळे प्रचंड मोठा आवाज निर्माण होत आहे. विशेषतः रात्रीच्यावेळी ट्रक, डंपर व इतर अवजड वाहनांच्या आवाजामुळे परिसर दणाणून जात आहे. गतिरोधकावरील पांढरे पट्टे दिसत नसल्याने वाहनचालकांना तो लांबून लक्षात येत नाही. काही अवजड वाहन चालक, तर हा गतिरोधक दिसत असूनही त्याच्यावरून वेगाने वाहन पळवतात. त्यामुळे तर आणखी जोरात आवाज होतो.
हा जुना गतिरोधक हटवून पीसीएनडीटीएच्या प्रवेशद्वारासमोर नियमानुसार नवीन गतिरोधक उभारण्याची मागणी स्थानिक रहिवाशांनी प्रशासनाकडे केली आहे. तसेच नव्या गतिरोधकावर स्पष्ट पांढरे पट्टे मारावेत, अशीही मागणी करण्यात आली आहे.