मोशीतील जाळीचा मळा परिसरातील रस्त्यांची दुरवस्था

मोशी, ता. २२ : मोशीतील राजा शिवछत्रपती चौक ते अलंकापूरम मार्गे चऱ्होलीकडे जाणाऱ्या मार्गावरील जाळीचा मळा परिसरातील रस्त्यांची दुरवस्था झाली आहे. रस्त्यावर ठिकठिकाणी पडलेल्या खड्ड्यांमुळे दुचाकी, तीनचाकी वाहनचालकांसह स्थानिक नागरिकांना त्रासाला सामोरे जावे लागत आहे.
राजा शिवछत्रपती चौक ते रस्त्यावरील पेट्रोल पंपापर्यंतचा रस्ता चांगल्या स्थितीत आहे. मात्र, जाळीचा मळा परिसरापासून अलंकापूरमच्या अलीकडील वळणापर्यंत रस्त्यावर जागोजागी खड्डे निर्माण झाले आहेत. दुचाकीस्वारांना या रस्त्याचा मोठा त्रास सहन करावा लागत असून पाठीच्या आजाराला निमंत्रण मिळत आहे.
आळंदी, चऱ्होली परिसरातील नागरिकांना पिंपरी-चिंचवड शहराकडे ये-जा करण्यासाठी हा मार्ग वेळ व इंधनाची बचत करणारा आहे. त्यामुळे या रस्त्यावर दिवसभर वाहनांची वर्दळ असते. शाळा, महाविद्यालयांतील विद्यार्थी, कामगार, उद्योजक तसेच लोकप्रतिनिधी यांचीही या मार्गावरून ये-जा असते. पावसाळ्यात खड्ड्यांमध्ये पाणी साचल्याने त्यांचा अंदाज येत नसल्यामुळे वाहनचालकांची अडचण आणखी वाढते. या मार्गाची तातडीने पाहणी करून डांबरीकरण करत खड्डे बुजवावेत, तसेच आवश्यक त्या ठिकाणी रस्त्याचे डांबरीकरण करावे, अशी मागणी नागरिकांकडून होत आहे.