आकुर्डीतील विठ्ठल मंदिर जवळील अतिक्रमणे महापालिकेकडून हटवली

निगडी : संत तुकाराम महाराज पालखी सोहळ्याच्या स्वागतासाठी आकुर्डीतील श्री विठ्ठल मंदिर आणि संपूर्ण परिसर उत्सव मय झाला आहे. भाविक व वारकऱ्‍यांसाठी आवश्यक सर्व सुविधा उपलब्ध करून देण्यात आल्या आहे. मंदिर परिसरात मोठा उत्साह दिसत आहे.
जगद्‌गुरु संत तुकाराम महाराज यांच्या पालखीचा पहिला मुक्काम असलेल्या आकुर्डी येथील श्री विठ्ठल मंदिरात पालखी आगमन सोहळ्याची तयारी पूर्ण झाली आहे. भाविक आणि वारकऱ्यांच्या सेवेस अडचण ठरणारी अतिक्रमणे महापालिकेकडून हटविण्यात आली आहेत. तसेच परिसराची संपूर्ण स्वच्छता केली गेली आहे.
विठ्ठल मंदिराच्या प्रांगणात भव्य स्वागत मंडप उभारण्यात आला आहे. पालखी सोहळ्यात सहभागी होणाऱ्या वारकऱ्यांसाठी अन्नदान, निवास व पिण्याच्या पाण्याची व्यवस्था करण्यात आली आहे, असे श्री विठ्ठल मंदिर देवस्थान ट्रस्ट प्रमोद कुटे, गुलाब कुटे यांच्यावतीने सांगण्यात आले आहे. महापालिकेच्यावतीने पिण्याच्या पाण्यासह परिसरातील साफसफाई व फवारणीचे काम पूर्ण करण्यात आले आहे. वैद्यकीय सुविधा आणि अन्नदानाचे नियोजन करण्यासाठी सामाजिक संस्था व स्वयंसेवी संघटनांनीही पुढाकार घेतला आहे.