जोरदार पावसामुळे वारकऱ्यांची गैरसोय; राहण्याच्या जागांमध्ये पाणी साचले, आरोग्याचा प्रश्न गंभीर

जोरदार पावसामुळे
वारकऱ्यांना अडचणी

निगडी : जोरदार पावसामुळे वारकऱ्यांच्या मुक्कामाच्या ठिकाणी काही अडचणी निर्माण झाल्या. आकुर्डी, रावेत आणि निगडी प्राधिकरण परिसरातील काही तंबूंमध्ये पाणी साचले. या परिस्थितीचा तातडीने आढावा घेत पिंपरी-चिंचवड महापालिकेच्या आरोग्य विभागाने कार्यरत डॉक्टर आणि आरोग्य कर्मचाऱ्यांना वारकऱ्यांच्या सेवेसाठी सज्ज ठेवले आहे. कुटे दवाखान्याचे वरिष्ठ वैद्यकीय अधिकारी डॉ. बाळासाहेब होडगर म्हणाले, ‘‘पावसामुळे सर्दी, ताप, डेंगी, संसर्गजन्य आजार होण्याचा धोका वाढतो. आम्ही २४ तास आरोग्य सेवा उपलब्ध केली आहे. औषध, प्राथमिक तपासणी व उपचाराची सोय केली आहे. याशिवाय काही स्थानिक खासगी डॉक्टरांनीही नि:शुल्क सेवा देण्याची तयारी दर्शवली आहे. वारकऱ्यांच्या सेवेसाठी ही वेळ साजेशी आहे. आम्ही प्राथमिक औषधोपचार मोफत करत असल्याचे डॉक्टरांनी सांगितले.

छत्री व रेनकोटचे वाटप
सतत होत असलेल्या पावसामुळे अनेक सेवाभावी संस्था व तरुण कार्यकर्ते मैदानात उतरले आहेत. वारकऱ्यांना पावसापासून संरक्षण मिळावे म्हणून छत्र्या, रेनकोट, प्लास्टिक शीट्सचे वाटप सुरू आहे. नवनाथ मित्र मंडळ, उत्कर्ष प्रतिष्ठान, प्रेरणा सेवा संघ, यासारख्या संस्था सक्रियपणे सामग्री वाटप करत आहेत.