रावेत पंपिंग स्टेशन चौकात झाडाच्या फांदीने सिग्नल झाकोळला

रावेत, ता.२४ ः रावेत पंपिंग स्टेशन चौकात झाडाच्या वाढलेल्या फांद्यांमुळे वाहनचालकांना वाहतूक नियंत्रक दिवे दिसत नाहीत. त्याने वाहतूक नियमांचे उल्लंघन होऊन अपघाताची शक्यता निर्माण झाली आहे.
या फांद्यांची तातडीने छाटणी होणे अत्यावश्यक आहे. नागरिकांनी वेळोवेळी हा मुद्दा अधोरेखित केला आहे. लवकरात लवकर योग्य पावले उचलल्यास मोठ्या दुर्घटनांना अटकाव करता येईल, अशी अपेक्षा वाहनचालक व्यक्त करत आहेत.
वाहनचालक रमेश वाघमारे म्हणाले, ‘‘सिग्नल अगदी शेवटच्या क्षणी दिसतो. त्यामुळे वाहन थांबवावे की नाही, हे समजत नाही. त्यामुळे अचानक ब्रेक लागणे अशा घटना वारंवार घडत आहेत.’’
स्थानिक रहिवासी जयश्री काळघे म्हणाल्या, ‘‘या चौकातून शाळेची वाहने, दुचाकी आणि मोठ्या प्रमाणात अवजड वाहने जातात. सिग्नल दिसत नसल्याने शाळकरी मुलांच्या सुरक्षेचा प्रश्नही उभा राहतो आहे.’’
महापालिकेच्या बीआरटीएसचे अधिकारी बापू गायकवाड म्हणाले, ‘‘सिग्नलसाठी अडथळा ठरणाऱ्या फांद्यांची त्वरित छाटणी केली जात आहे. रावेत पंपिंग स्टेशन चौक सिग्नलजवळील झाडांच्या फांद्या तातडीने छाटण्याचे निर्देश उद्यान विभागाला दिले आहेत.’’

NGI25B00545