ढोल-ताशा पथकांचा सराव रावेतमध्ये सुरू

रावेत, ता. १३ ः अवघ्या काही आठवड्यांवर गणेशोत्सव येऊन ठेपल्याने रावेत आणि आकुर्डी परिसरात वाद्य वादन पथकांनी ढोल - ताशांचे पूजन करून जोरदार सरावास सुरुवात केली आहे. अनेक नामांकित पथके नदी पात्रातील मोकळी जागा, मैदाने आणि इतर मोकळ्या जागांवर सराव करताना दिसत आहे.
या जागांवर तरुणाई सायंकाळी मोठ्या संख्येने ढोल-ताशांचा ताल शिकण्यासाठी एकत्र येत आहे. त्यात लहान मुलांपासून ज्येष्ठांपर्यंत, नोकरी व व्यवसाय करणारे महिला व पुरुष सरावात उत्साहाने सहभागी होत आहेत.
अनेक पथकांनी सदस्यांची संख्या वाढवली असून नवीन तालांचे आणि सादरीकरणाचे प्रयोगही केले जात आहेत. पथकांचे प्रमुख, अनुभवी वादक हे नवीन वादकांना मार्गदर्शन करत आहेत. सराव करतेवेळी सदस्यांच्या सुरक्षेची खबरदारी घेतली जात आहे. ध्वनिप्रदूषण नियंत्रणात ठेवण्यासाठी आणि वाहतुकीला अडथळा निर्माण होऊ नये यासाठी पथके नियोजित वेळेनुसार आणि दिलेल्या जागांवर सराव करतात. ढोल-ताशा वादनामुळे शारीरिक हालचाली होत असल्याने व्यायाम प्रकार म्हणूनही याकडे पहिले जाते.
हिंदुजागरण गर्जना पथकाचे अध्यक्ष अतीश पैवारे म्हणाले,‘‘ढोल - ताशा वादन हे केवळ वादन नाही; तर सामाजिक जाणीवेचे प्रतिक आहे. संस्कृती जपतानाच ती पुढच्या पिढीला हस्तांतरीत करणे महत्वाचे आहे.’’
NGI25B00635