‘डीपी’तील आरक्षणांविरोधात रावेतमध्ये आंदोलन

रावेत, ता. १४ : ‘‘पिंपरी चिंचवड महापालिकेने नवीन प्रारूप विकास आराखडा (डीपी) जाहीर केला. यात खासगी मालमत्तांवर आरक्षणे टाकण्यात आली आहेत,’’ असा आरोप करत रावेत व किवळे परिसरातील नागरिकांनी रविवारी (ता.१३) आंदोलन केले. नागरिक, महिला भगिनी, ज्येष्ठ नागरिक आणि युवकांनी या निषेध सभेद्वारे ‘‘अन्यायकारक आरक्षण रद्द करा’’ अशा घोषणा दिल्या.

रावेतमधील सर्वे क्र. ५५ व ५६ वर लादलेले दफनभूमीचे आरक्षण (आरक्षण क्र. ८/७९), तसेच किवळेमधील सर्वे क्र. ९५ व ९६ वरील सांडपाणी प्रक्रिया प्रकल्पाचे आरक्षण (आरक्षण क्र. ८/८०) यासह अन्य अनेक ठिकाणी सामान्य नागरिकांच्या खासगी जमिनींवर लादलेली आरक्षणे हा आंदोलनाचा विषय होता.

‘‘दफनभूमीसारखे आरक्षण आमच्या जीवन, मालमत्तेची किंमत आणि मानसिक आरोग्यावरही परिणाम करणारे आहे,’’ असे आंदोलक म्हणाले. तर, रहिवासी कल्पना शिंदे म्हणाल्या, ‘‘आम्ही घर घेताना भविष्याचा विचार केला होता, आता या आरक्षणामुळे अनिश्चितता वाढली आहे.’’
सभेच्या अखेरीस नागरिकांनी शांततामय, पण तीव्र आंदोलन उभारण्याचा आणि कायदेशीर मार्गाने लढा देण्याचा निर्धार व्यक्त केला. पुढील काळात पालिकेकडून या मागण्यांवर काय प्रतिसाद येतो, याकडे संपूर्ण परिसराचे लक्ष लागले आहे.

चिंचवड विधानसभा मतदारसंघातील सामान्य नागरिकाच्या जागेलाही धक्का लागू देणार नाही. अन्यायकारक असणारी आरक्षणे रद्द करून नवीन विकास आराखडा अंतिम केला जाईल.
- शंकर जगताप, आमदार, चिंचवड