दुर्गा टेकडी येथे ‘सहा दिवस सहा वाटा’ अभियान

निगडी, ता. २९ : फ्रेंड्स ट्रेकिंग क्लबच्या वतीने ‘सहा दिवस सहा वाटा’ हे अभियान दुर्गा टेकडी येथे राबवण्यात आले. युवकांना व नवीन सदस्य यांच्यामध्ये गिरीभ्रमणाची आवड निर्माण व्हावी, मोबाइलपासून त्यांनी दूर व्हावे या उद्देशाने या अभियानाचे आयोजन करण्यात आले होते.
दुर्गा टेकडी परिसरातील कठीण वाटांनी चढाई करत हे अभियान पार पडले. फ्रेंड्स क्लबचे अध्यक्ष वसंत ठोंबरे आणि ज्येष्ठ गिर्यारोहक विश्वास सोहोनी यांच्या संकल्पनेतून ही मोहीम आयोजित करण्यात आली. यामध्ये तीनशेपेक्षा जास्त सदस्य सहभागी होते. समारोप प्रसंगी प्रमुख पाहुणे म्हणून शिवव्याख्याते राजेंद्र घावटे हे उपस्थित होते.
अभियान हे नुसते चालणे व चढाईचे नव्हते. तर या अभियानात घोषणा, जागर, गाणी, गण गवळण, अभंग, भारुड, पोवाडे, विनोदांचे सादरीकरण करण्यात आले.
अभियानात संदीप पोतनीस, सुभाष चव्हाण, विनोद इनामदार, विश्वास सोहोनी यांनी गाणी सादर केली, तर शाहीर जयसिंग कांबळे यांनी पोवाडे, महाराष्ट्र गीत गाऊन वीरश्री निर्माण केली. अभियान यशस्वी करण्यासाठी श्रीकांत जोशी, सुभाष चव्हाण, मधुकर देवकर, संजय पालकर, संजय दुर्वे यांनी पुढाकार घेतला.

PNE25V35340