रात्रीच्या बांधकामांमुळे झोपेत व्यत्यय

रावेत, ता. ४ ः रावेत आणि आकुर्डी परिसरात मोठ्या प्रमाणात विकास कामे सुरू आहे. तसेच बांधकाम व्यावसायिकांच्या अनेक बांधकाम प्रकल्प दिवस - रात्र सुरू असल्यामुळे परिसरात आवाजाचे प्रदूषण वाढत आहेत. त्याबाबत स्थानिक नागरिकांनी वारंवार तक्रारी देऊनही महापालिका प्रशासन त्याकडे दुर्लक्ष करत असल्याचे चित्र आहे.
रावेत आणि आकुर्डीमधील दाट लोकवस्तीच्या ठिकाणी मोठमोठे टॉवर उभे राहत आहेत. वेळेत प्रकल्प पूर्ण करण्याच्या हेतूने बांधकाम व्यावसायिक दिवस - रात्र बांधकाम करत आहे. त्यामुळे होणाऱ्या आवाजाचा स्थानिकांना मन:स्ताप होत आहे. खास करुन रात्रीच्यावेळी होणाऱ्या कामांमुळे नागरिकांच्या विश्रांतीस अडथळा निर्माण होत आहे. तसेच त्यांच्या आरोग्यावर परिणाम होत आहे.
गृह बांधकामाच्या वेळेचेही नियम आहेत. वेळेवर काम झाल्यास आम्हाला हरकत नाही. मात्र, रात्रीचा आमच्या विश्रांतीचा वेळ असतो, हे लक्षात घ्यायला हवे. त्यामुळे बांधकाम व्यावसायिकांनी वेळ पाळून कामे करावीत. याबाबत महापालिकेतील संबंधित विभागाने तत्काळ कारवाई करावी. अन्यथा हे काम रोखण्यासाठी आम्हालाच पुढे यावे लागेल, असा इशारा नागरिकांनी दिला आहे.

रावेत येथील गृहबांधणी प्रकल्पाचे बांधकाम रात्रीच्यावेळेस सुरू ठेवून नागरिकांना त्रास दिला जात आहे. याबाबत स्थानिक नागरिकांनी वेळोवेळी महापालिकेकडे तक्रारी केल्या आहेत. मात्र, अद्याप कोणतीही ठोस कारवाई झालेली नाही.
- शुभंकर रावते, स्थानिक नागरिक

महापालिका प्रशासनाच्या पर्यावरण विभागाअंतर्गत रात्रीच्यावेळेस आवाजाचे प्रदूषण करणाऱ्या बांधकाम प्रकल्पांवर लक्ष ठेवण्यासाठी पथक तयार करण्यात आले आहे. यापूर्वी एक तक्रार आली होती. त्यावर कारवाई करून त्यांना दंड करण्यात आला आहे. रावेत, आकुर्डी भागांत रात्रीच्यावेळी असे काम सुरू असल्याचे निदर्शनास अथवा तक्रार आल्यास त्वरीत कारवाई करण्यात येईल. दंड सुद्धा आकारण्यात येईल.
- मकरंद निकम, सहशहर अभियंता, बांधकाम विभाग, महापालिका