डिजिटल पेमेंट सुविधेअभावी नागरिक त्रस्त

रावेत, ता. १४ : महानगरपालिकेच्या आकुर्डी, प्राधिकरण, निगडी, रावेत, किवळे भागातील रुग्णालयांत आणि दवाखान्यांमध्ये अद्यापही डिजिटल व्यवहाराच्या सुविधा नाहीत. त्यामुळे आपत्कालीन परिस्थितीत नागरिकांना रोख रक्कम बाळगणे भाग पडत असून मोठा मानसिक ताण आणि उपचारांमध्ये विलंब होत आहे.
केंद्र सरकारकडून डिजीटल इंडिया उपक्रमांतर्गत रोकडरहित अर्थव्यवस्थेला चालना दिली जात आहे. त्यामुळे बहुतेक खासगी रुग्णालये, औषध दुकाने, किराणा दुकानांपासून ते रस्त्यावरच्या विक्रेत्यांपर्यंत सर्वत्र ‘यूपीआय’ द्वारे रक्कम स्वीकारली जाते. मात्र, महापालिकेच्या रुग्णालयांत या सुविधेचा अभाव असल्याचे दिसून येत आहे.
अनेकदा रुग्णालयांमध्ये तातडीची शस्त्रक्रिया किंवा उपचार करावे लागतात. अशावेळी जवळ पुरेसे रोख पैसे नसल्याने नातेवाईकांना बाहेर जाऊन पैसे काढावे लागतात. त्यामुळे उपचार प्रक्रियेत विलंब होतो आणि रुग्णाची प्रकृती बिघडण्याचा धोका वाढतो. या पार्श्वभूमीवर, महापालिकेने तातडीने सर्व रुग्णालये आणि आरोग्य केंद्रांत ‘युपीआय’ कार्ड स्वाईप मशिन, नेट बँकिंग यासारख्या सुविधा सुरू करण्याची मागणी नागरिकांनी केली आहे.

डिजिटल व्यवहारासाठी विविध प्रकारच्या प्रक्रिया असतात. महापालिकेच्या लेखा विभागात यासंदर्भात बोलणे झाले आहे. डिजिटल पेमेंट प्रणाली सुरू करण्यासाठी संबंधित बँकांशी प्रक्रिया सुरू आहे. मात्र, तांत्रिक कारणांमुळे विलंब झाला आहे. लवकरच ही सुविधा सुरू होईल.
- डॉ.लक्ष्मण गोफणे, मुख्य आरोग्य वैद्यकीय अधिकारी, महापालिका

मला ताप आला म्हणून उपचारासाठी आले होते. माझ्याकडे रोख रक्कम नव्हती. मात्र, त्यासाठी माझी गैरसोय झाली. डिजिटल पेमेंट प्रणाली असल्यास नक्कीच लाभ होईल.
- लता राठोड, स्थानिक नागरिक