रावेतमधील विसर्जन घाटाची आरोग्य विभागाकडून स्वच्छता मोहीम

रावेत, ता. १८ ः गणेशोत्सवाच्या पार्श्वभूमीवर पिंपरी चिंचवड महानगरपालिकेच्या ‘ब’ प्रभागातील आरोग्य विभागाकडून वाल्हेकरवाडी रस्त्यावरील जाधव विसर्जन घाट स्वच्छता मोहिमेची जोरदार सुरुवात करण्यात आली आहे.
गणेशोत्सव हा आपल्या संस्कृतीचा अविभाज्य भाग आहे. मात्र, या सणानंतर पर्यावरणाचे रक्षण करणे आपली सामूहिक जबाबदारी आहे. यासाठीच विसर्जन घाट स्वच्छ ठेवणे, तसेच नदी-तलावांमध्ये प्रदूषण होऊ न देणे ही प्राथमिकता ठेवून ही मोहीम राबवली जात आहे. घाट परिसरातील गाळ, प्लास्टिक व इतर कचरा हटवून परिसर स्वच्छ करण्यात येत आहे. याशिवाय पाणी शुद्धीकरणासाठी आवश्यक औषधे टाकून नदी व तलावांचे प्रदूषण कमी करण्याचे काम सुरू आहे.
नदीकाठावर प्लास्टिकच्या पिशव्या, थर्माकोल, विघटन न होणाऱ्या सजावटीचे साहित्य टाकू नये. निर्माल्य टाकण्यासाठी ठेवलेल्या कुंडीतच निर्माल्य टाकावे, असे आवाहन आरोग्य विभागाने नागरिकांना केले आहे.
महापालिकेच्या ‘ब’ प्रभागाचे आरोग्य निरीक्षक सुधीर वाघमारे म्हणाले,‘‘रावेतमधील प्रमुख विसर्जन घाटांवर विशेष पथके नेमण्यात आली आहेत. त्याबाबतचा आदेश लवकरच संबंधित कर्मचाऱ्यांना देण्यात येईल. या पथकांमध्ये आरोग्य कर्मचाऱ्यांसह सफाई कर्मचारी, पर्यावरण विभागाचे अधिकारी व स्वयंसेवी संस्थांचे कार्यकर्ते सहभागी असणार आहेत. गणपती विसर्जनासाठी आवश्यक तेथे विसर्जन घाटाची देखभाल आणि स्वच्छता ठेवली जात आहे.’’